QREDITS AWOR TA FASILITÁ MIKROKREDITO NA KÒRSOU TAMBE

QREDITS AWOR TA FASILITÁ MIKROKREDITO NA KÒRSOU TAMBE

Willemstad, 17 aprel 2018- Un di kuater  establesimentu di Qredits den Karibe ta un echo! Awe ofisialmente e ofisina lokal di e establementu di mikrokrédito aki a keda inougurá pa minister presidente, sr Eugene Rhuggenaath. Na e kantor aki di Qredits empresarionan lokal por akudí pa un mikrokrédito te ku Fls. 50.000,- i tambe pa risibi guia i coaching. Ya na Boneiru, Aruba i  Sint Maarten diferente empresario ta hasiendo uzo di e posibilidatnan ku Qredits ta brinda.

 

Otorgashon di krédito sin finnan di lukro

Ya for di aña 2009 e kompania Qredits a bin ta otorgá krédito na empresarionan eksistente i esnan ku kier kuminsá un propio empresa na Ulanda. Qredits ta un organisashon sin finnan lukrativo kaminda stimulashon di e espiritu empresarial ta pará sentral. Netamente pa e motibu aki Qredits ta paga èkstra atenshon riba e posibel futuro di e empresario na momento di evaluashon di petishonnan risibí. E pashon i e espiritu empresarial serka e petishonario ta di sumo importansia. For di aña 2015 Qredits ta aktivo na Boneiru tambe i aña pasá a establesé tambe e kantornan na Aruba i tambe Sint Maarten, Saba i Sint Eustatius.

Kòrsou ta e chèri riba e bolo

Direktor i orguyoso fundador di Qredits, sr. Elwin Groenevelt, ta deseá di hasi e soño empresarial di un i tur un realidat. Dia 20 di òktober 2017 Qredits a firma un akuerdo ku minister di Desaroyo Ekonómiko, sr Steven Martina. E akuerdo aki ta hasi posibel pa habri un ofisina di Qredits aki na Kòrsou. “Establesimentu di un ofisina di Qredits na Kòrsou ta hasi posibel ku awor ofisialmente tur hende ku ta forma parti di Reino Ulandes por hasi un petishon di krédito serka nos. Ku e vishon ku nos ta karga pa realisá mas tantu soñonan empresarial posibel, e echo di tin un ofisina na Kòrsou tambe ta realmente e chèri riba e bolo. Di e forma aki nos ta habri e posibilidat pa yuda aun mas hende ku kier kuminsá nan propio empresa. I ta netamente pa esaki no ta hasi’é.

Promé petishonnan ya t’aden

Apesar ku e kantor di Qredits ahinda no a keda habrí ofisialmente, nos empresarionan lokal ya tabata sa di haña kontakto ku e ofisina di mikrokrédito. Di e forma aki pues ya e promé petishonnan a drenta pa medio di entre otro e página di Facebook i e wèpsait di Qredits Kòrsou. E  konseheronan empresarial lokal,  Raiska Herrera i Thom van der Weide ya ta trahando sumamente duru pa por evaluá e petishonnan aki. Ku e apertura ofisial di e ofisina di Qredits Kòrsou ta posibel pa un empresario pasa personalmente tambe na e kantor situá na Caracasbaaiweg 186B, pegá ku e ofisina di Dushi Homes i tuma informashon liber di kompromiso. E wèpsait di Qredits Kòrsou ta disponibel tantu na Papiamentu komo Ulandes via www.qredits.com. Un petishon pa krédito por wòrdu yená riba e wèpsait aki i e dokumentonan nesesario tambe por keda mandá elektrónikamente.

80 krédito

Meta di Qredits Kòrsou ta pa otorgá masomenos 80 krédito di manomenos Fls. 30.000 den 2018. Aparte di esaki Qredits ta spera di por guia mas di 200 empresario aspirante den establesimentu di nan propio negoshi e aña aki. Qredits kier tene tambe un kombersashon ku sektor di enseñansa di Kòrsou pa asina brinda e posibilidat di ofrese e programa “ Ik word Eigen Baas” den nos sistema di enseñansa. E programa elektróniko di Kon pa skirbi un plan empresarial ( Ondernemingsplan Schrijven) ta disponibel tantu na Ulandes komo Papiamentu i lo wòrdu ofresé pa medio di vouchersnan optenibel na kantor di Qredits.

 

QREDITS AWOR TA FASILITÁ MIKROKREDITO NA KÒRSOU TAMBE